Tahimik akong nagmamasid
habang unti-unting tinatangay
ng espiritu ng alak
ang aking kamalayan.
Sa kutitap ng tila
bahagharing mga ilaw dagitab,
pinaiigting ng maharot mong indayog
ang init na kumukubabaw
sa aking katinuan.
Sabay na bumubulong
ang anghel at ang dyablo
pilit na nililito itong utak
na sa alak ay lango.
Impit ang samo
ng latak ng kamusmusan
na mali itong naglalaro
sa aking isipan.
Nakaririnding sigaw naman
ang pang-akit ng kamunduhan
sinasabing oras na
upang ikaw ay paglaruan.
Magpapatalo ba ako?
Nahihilo na ako.
Unti-unting kinakain ng libog
itong awang nadarama
sa dalagang gumigiling
sa tanghalang madilim.
(c) Jheric A. Saracho
January 11, 2005
No comments:
Post a Comment